رمضان كريم

كل سنة وأنتوا طيبيين

تصوير / أيمن نصار

وجاء وقت الرحيل .. وداعا شباب البلوجز .. وألقاكم قريبا

مع الملك

بحـــر ينفــرد .. أول حديث مع الملك بعد تنصيبه رسميا

الحكمة التى يؤمن بهـا .. الجديد عند الملـك .. أنا مبحسش

استقبلنى ملكنا المعظم بابتسامته المعهودة .. وبساطته المعروفة .. في خص بسيط يجلس فيه أمام قصره المهيب

وكان هذا الحوار .. ه

بحر : في البداية أحب أهنيك بتتويجك رسميا ملك للبلاد

الملك : الله يخليك .. الموضوع كان أبسط من كدة بكتير

بحر : ياترى ايه إحساسك بعد تتوجيك بإرادة الشعب

الملك : خد انفراد ليك .. أنا مابحسش

بحر : ناس كتير بيشككوا في صحتك .. خصوصا إن سنك الأصلى معروف للجميع

الملك : دول ناس فاضية .. وولاد كلب .. أنا بمب بمب بمب .. حتى أسأل الملكة .. ولا على أيه

فاصــــــــــــــــــــــــــــــل

بحر : لأ صحة ياعرب .. فعلا ناس فاضية وولاد كلب

بحر : وياترى بعد فوزك الكاسح .. في جديد هنشوفه

الملك : أكيد في جديد .. والله أنا بقالى 24 سنة شغال .. وأنتوا حاسين .. عشان كدة الست سنين دول هاقضيهم استمتاع

بحر : ايه سر السوالف البيضا اللى شوفناك بيها فى خطاب التنصيب ؟

الملك : لأ دى بس من فرحة الفوز .. وبعدين جيمي قاللى أعمل كدة .. ابقى اسأله هو

بحر : وبعيد عن السياسة ووجع دماغها .. ايه أكترأغنية بتحبها ؟

الملك : وراك أنا والزمن طويل

بحر : وحكمة بتؤمن بيها

الملك : مبارك لمصر ومصر لمبارك

بحر : حلم بتحلم بيه

الملك : أفوز في الأنتخابات اللى جايه

بحر : واحد بتثق فيه

الملك : ولى العهد .. الأمير جيمى

بحر : كلمة لجلالة الملكة سوزى

الملك : كل عام وأنتى حبيبتي

بحر : وكلمة للأمير علاء

الملك : شد حيلك .. أنا سيبك تأمن مستقبلى

أنا سيبك تأمن مستقبلى .. وبهذا ننهى حوارنا الشيق مع جلالة الملك المعظم - حفظه المولى ورعاه وأيده بنصره وحماه - ولا عزاء في شعب عندكم

عاش الملك .. عاش الملك .. عاش الملك

الليل وآخره

تساؤل برئ .. هل أصبحنا شعبا من المعتوهين يعيش في مصحة كبيرة ؟

من العوامل المؤثرة في آن واحد .. هو وجود عوامل متغيرة في الأيدولوجية الشعبية .. وهو مايدفع لتغيير ظروف الحياة ومن ثم الاحتمالات الثابتة للمتغيرات الموجودة .. وبالتالى فإن الخطوات تسير وفق استراتيجية محددة تنمو فوق تلك الاحتمالات الثابتة مع وجود فوارق في النواحى السيكولوجية في التعبير الوقتي للعوامل .. وبالتالى نصل للعنصر التحليلي الأول لوجود الاصلاح في المتغيرات الموجودة السابق ذكرها .. ه
صدقنى إنها أجندة الحزب الوطنى لإصلاح ما أفسده الحزب الوطنى .. حد فاهم حاجة ؟ ولاهم فاهمين .. ه

الملك مبارك معمرا .. حقيقة وماأخشاه أنم يكون له روحين

بحثت كثيرا عن سبب نضارة وجه مبارك وتمتعه بصحة جيدة رغم عمره الطويل أمد الله فيه .. هل السبب غزالة مطروح الأسبوعية ؟ أم أموال سويسرا المستخبية ؟

أم وجه هناء السمرى المشرق دائما ؟

وفي النهاية أدركت السبب الحقيقي .. إنه ابتعاد الملكة سوزى عنه أغلب الوقت .. ه

رجاء خاص أوى .. إلى من يشككون في صحة مبارك .. كفاية كدة أحسن يتغاظ ويجيب لنا عيل ..ه

هدايا انتخابية : ارتفاع سعر الحديد وارتفاع سعر الأسمنت .. ربنا يستر بعد القسم

أكثر مايسئ للأمير جمال أنه ابن الملك مبارك

هؤلاء يحكموننا من خلف الستار .. كمال الشاذلى وجمال مبارك وأحمد عز

خدعوك فقالوا .. نظيف رئيس وزراء المحروسة

في انتصار مدوى للحرية .. وهزيمة برده مدوية للقهر والبيروقراطيه تمكنا من نص ساعة بس من تعليق أول مجالاتنا الحائطية في

كليتنا العتيدة .. عقبال الموافقة الأمنية على بلوج لينا وعقبال انتخابات الاتحاد .. أنا مبسوط

عاش الملك .. عاش الملك .. عاش الملك

آه صحيح ياريت تسمعوا أغنية الشيخ إمام كلها وماحدش يزهق

أخبارنا الملكية ابتدت .. طاب مساءكم

قامت الملكة سوزان بإعداد أول طشة ملوخية في القصر الملكي الجديد بوادى النطرون

أعلن مبارك باشا الكبير تعيين ولى العهد الأمير جمال رئيسا للوزراء خلفا لوزارة الأمير المنحله

قام مبارك باشا الكبير بتعيين كبير الياوران الأمير هيثم قائدا عاما لقواتنا الملكية المتسلحة

في حفل أسري بهيج .. احتفلت الأسرة الملكية بشراء الأمير علاء قناة السويس والهرم الأصغر

أهدى مبارك باشا الكبير معبدى الدير البحري وأبو سمبل هدية للرئيس الأمريكي تقديرا لجهوده في إحياء عملية السلام بصفط اللبن

سجلت الموازنة المالية العامة للعام الحالى ارتفاعا حادا صحبه نوبة برد متينة إثر ارتفاع قيمة السخسوخ المصرى بقيمة 0.02%ه

انطلقت أمس مظاهرات حاشدة بالقلعة وشبرا وباب اللوق تنشد باسم جلالة الملك -حفظه الله- وتندد بالاحتلال الغربي لسيناء

والصحراء الشرقية والسواحل الشمالية للمملكة

ومن أخبارنا الرياضية : استطاع فريق الجيش الملكى التغلب على فريق الشعب ..والحاق هزيمة ساحقة به ..أدار اللقاء الحكم الدولى مرعي بتاع الكلمه .. وفور اللقاء تم تعيين الحكم الدولي وزيرا للحقانية بالمملكة

ومن اخبارنا الجوبة : استمرت درجات الحرارة في الارتفاع غير المسبوق ..مع سقوط أمطار ثلجية شديدة الصلابة على جميع مقاطعات المملكة .. ولذا ينصح وزير الداخلية المواطنين بالتزام بيوتهم خوفا من تعرضهم للبرق والرعد والصعق

اخبارنا الملكية انتهت ..طاب مساؤكم

عاش الملك .. عاش الملك .. عاش الملك

البقاء لله

من 72 مليون32 مليون بس ليهم حق الانتخاب

من 32 مليون ليهم حق الانتخاب حوالى 7 مليون بس انتخبوا

ومن الـ7مليون حوالى 6 مليون صوتوا لصالح مبارك

يعني 6 مليون حددوا مصير 72 مليون يعني حوالى 9%حددوا مصيرنا

وقال ايه حاز مبارك على الأغلبية المطلقة

والنتيجة ايه؟

حالنا هيفضل زى ماهو

تفتكر الحزب الوطني هينفذ برنامج مرشحه..مش هيضحكوا علينا عاشر ؟

ممكن مبارك بعد سبتمبر يكون أحسن من مبارك قبل سبتمبر؟

تفتكر حالنا هيتعدل ؟

البقاء لله

باقي 24 ساعة..لأ 23ساعة 59دقيقة

بعد حوالى 24 ساعة تبدأ الانتخابات الرئاسية الأولى في مصر منذ مش عارف كامتلاف سنة -حكامنا ديمقراطيين جدا من زمان- .. والحقيقة إن كل أجهزة الدولة كانت على استعداد تام لاستقبال الحدث الكبير ..وبالتأكيد الصراع هيكون كبير وشرس وحاد ومش مضمون وغريب ورهيب وعجيب بين المرشحين العشرة -في عنين العدو- لرئاسة المحروسة

وفي إطار الاعداد لليلة الكبيرة قام المرشحين العشرة بالمشاركة مع الشعب المصري بإجراء تمرينة خفيفة بقيادة المدير الفني كابتن جمال مبارك وبمعاونة كابتن على الدين هلال وكابتن محمد كمال ..من المنتظر إن يكون التشكيل كالآتي..ه

هنلعب ولأول مرة بطريقة3/4/3طبعا من غير حارس مرمى لأن لعيبتنا جامدة ومفيش كورة هتوصل لورا أصلا ..ليبرو هيعمل دماغ ورا أحمد الصباحى ..مساكين هيقف في اليمين ابراهيم ترك وفي الشمال الغزال وطبعا هيقفلوها بالضبة والمفتاح..خط الوسط من اليمين للشمال وحيد الأقصري ممدوح قناوى ووو آه آه أسامة شلتوت والعجرودي وطبعا نلاحظ إنه خط وسط لياقته البدنية عالية جدا ..عندنا تلاتة روووس -3واو عشان الحياد والحيدة- حربة هيلاعبهم مثلث قاعدته لتحت فيه نعمان جمعة والنجم أيمن نور ..وهيلعب قدام الموهوب المتخضرم مبارك

طبعا نتوقع مشاركة جماهيرية عالية ومرتفعة وكبيرة وهايلة نظرا لأهمية المبارة والعدل التحكيمي المعهود في المحروسة ..لكن السؤال اللى بيشغل نفسه ومحيرنا مين أكتر واحد الجماهير هتفتله هدافنا مبارك ولا جمعة ولا نور؟